| ٹنڈو جام (نامہ نگار) راہوکی کے مقام پر حکومت سندھ کی جانب سے قائم کئے گئے ٹول پلازہ پر ٹول ٹیکس کی وصولی کے خلاف ڈرائیوروں نے ٹول پلازہ پر توڑ پھوڑ کی، اسی دوران ڈرائیوروں اور ٹول ٹیکس کے عملے کے درمیان جھڑپیں ہوئیں اور وہاں موجود عملے کی حفاظت کیلئے موجود محافظوں نے ہوائی فائرنگ کردی۔ ڈرائیوروں اور عملے کے درمیان جھڑپوں کے بعد میر پور روڈ پر بدترین ٹریفک جام ہوگیا جس سے ہزاروں شہریوں کو سخت مشکلات کا سامنا کرنا پڑا۔ ٹول پلازہ کے عملے نے گاڑیوں سے ٹیکس کی وصولی معطل کر دی ہے۔ ٹنڈو جام پولیس نے جائے وقوعہ پر پہنچ کر حالات کو کنٹرول کیا ہے۔ پولیس نے بعض افراد کو حراست میں لے لیا ہے، واضح رہے کہ حکومت کی جانب سے میر پور خاص روڈ پر یکم نومبر سے ٹول ٹیکس کی وصولی کا اعلان کیا گیا تھا اور وصولی کے پہلے روز ہی سخت کشیدگی رہی۔ |
|
