| کراچی (اسٹاف رپورٹر) پاکستان پیپلزپارٹی حیدر آباد ڈویژن کا اجلاس وزیراعلیٰ سندھ اور پیپلزپارٹی سندھ کے صدر سید قائم علی شاہ کی زیر صدارت پیر کی شام وزیر اعلیٰ ہاؤ سمیں منعقد ہوا جس میں حیدرآباد ڈویژن کے اضلاع کے صدور اور جنرل سیکریٹریز نے شرکت کی اجلاس میں سیاسی صورتحال، تنظیمی امور اور اضلاع میں جاری حکومت سندھ کی جانب سے رواں ترقیاتی کاموں پر غور و خوص کیا گیا۔ اجلاس میں فیصلہ کیا گیا کہ 30/ نومبر کو پارٹی کا 42/ واں یوم تاسیس نہایت جو ش و خروش اور والہانہ انداز میں منایا جائے گا اور تجدید عہد کیا جائے گا۔ یوم تاسیس کا مرکزی جلسہ حیدرآباد میں منعقد ہوگا جس کا اہتمام پیپلزپارٹی حیدرآباد ڈویژن کرے گا اور جلسے سے پیپلزپارٹی کے مرکزی رہنما خطاب کریں گے اجلاس میں متفقہ طور پر قراردادیں منظور کی گئیں جس میں صدر پاکستان اور پیپلزپارٹی کے شریک چیئرمین جناب آصف علی زرداری کی قیادت پر اپنے مکمل اور بھرپور اعتماد کا اظہار کیا گیا۔ دوسری قرارداد میں پشاور، راولپنڈی اور لاہور کے نزدیک بابوصابو انٹرچینج پر پولیس چوکی پر خودکش دھماکوں کی شدید الفاظ میں مذمت کی گئی اور وزیرستان میں دہشت گردوں کے خلاف بھرپور اور کامیاب آپریشن کے نتیجے میں دہشت گردوں کو ہلاک کرنے اور ان کے ٹھکانوں کو تباہ کرنے پر پاک فوج کو زبردست خراج تحسین پیش کیا گیا۔ |
|
